ضرب .. ضرب .. ضرب .. وناس بتموت .. دول ثوار .. لأ دول بلطجية .. وناس بتموت .. ضربنا خرطوش .. لأ ماضربناش خرطوش .. وناس بتموت .. إيه اللي وداكوا هناك؟ .. مصر بتتحرق .. وبرضُه ناس بتموت.
- خلاص مش ح ننزل الشارع نتظاهر، مش ح ننزل م البيت أساساً .. ح نعمل عصيان مدني.
- الإقتصاد ح يتدمر .. عجلة الإنتاج .. حرام شرعاً .. مخربين .. عملاء.
أنا حـقاً اعترض .. ارحمونا بقى .. داحنا وربنا بنعمل ده علشانكم إنتو كمان .. كل مرة بتبقوا فريقين أخيب من بعض .. فريق بيشوه في المتظاهرين وأخلاقهم وصفاتهم .. وفريق بيصدق التشويه ده.
المرة دي وكالعادة لقيت إن جميع المحرضين ضد العصيان المدني ( اللي هما وبالصدفة نفس ذات المحرضين ضد أي نشاط ثوري ) بيقولوا كلام يموّت م الضحك، كلام كده وكالعادة برضُه مالوش علاقة ولا بالعلم ولا بالمعرفة .. حتى الناس اللي جابت مبرراتها من الدين .. الديـــــــــن .. بيقولوا كلام مالوش علاقة بيه ولا من قريب ولا من بعيد .. أنا بقى وعلى غير العادة قررت أخرج عن صمتي وأتكلم، يمكن أقدر أبسطها شويتين، فلو فيه حد فاهم غلط، يفهم صح .. وده حق ليكم علينا. :)
يعني إيه عصيان مدني، وإحنا ح نعمل ايه ؟؟
أولاً: يُعرف "بير هيرنجرين" العصيان المدني في كتابه "طريق المقاومة ممارسة العصيان المدني" بأنه:
نشاط شعبي متحضر، يعتمد أساساً على مبدأ اللاعنف.
أنشطة العصيان المدني هي عبارة عن تحدٍ لسياسة ما أو لقرار ما حتى ولو كانت غير مقيدة بالقانون.
هدف النشاط المباشر من العصيان المدني هو أن يحافظ على أو يغير ظاهرة معينة في المجتمع.
النتائج أو التبعات الشخصية جزء مهم من النشاط ولا ينظر إليها على أنها نتيجة سلبية. ويجب الانتباه إلى أن العصيان المدني تقوم أنشطته على التحدي، فلا تقيده قوانين النظام، أو قراراته، وإن كان أحياناً يتم عبر القوانين. ومن ثم لا يستطيع النظام أن يفرض على حركة العصيان نشاطاً بعينه أو يمنعها من نشاط، أو يفرض عليها ميداناً بعينه.
ثانياً: العصيان المدني بيبقى موجه ضد السلطة بشكل عام يعني القطاعات الحكومية المنتجة وأصحاب الأعمال الحرة المساهمة في تمويل الحكومة.
ثالثاً: العصيان المدني مش مطلوب من عمال اليومية، ولا أصحاب الأعمال الحرة الفردية، وبيتمثل دورهم لو أرادوا المشاركة في التوقف عن تمويل الحكومة بأي شكل ( المواصلات الحكومية مثلاً ).
رابعاًُ: أثناء العصيان بيتم تحييد القطاعات الحكومية اللي بتقدم خدمات حياتية ضرورية زي أفران العيش و المستشفيات لأنها موجهة للشعب مش للحكومة.
خامساً: أثناء العصيان المواطنين بيتوقفوا عن تمويل الحكومة بالإمتناع عن تسديد الفواتير ودفع الضرائب، حتى يتم تنفيذ مطالبهم .. وتعليقاً على النقطة دي ،، اللي شايف إن الخدمات اللي بندفع مقابلها فلوس زي الكهرباء والمياة والغاز والصرف الصحي هبة من الحكومة قد يتسبب العصيان في قطعها، مش حق أصلاً من حقوقك كمواطن ,, لن أتجادل مع أولئك العبيد حتى لا أسئ إلى نفسي.
سادساً: المساهمة مفتوحة، والمقصود بها أصلاً طلاب الجامعات والمدارس، والموظفين اللذين يحصلون على مرتبات شهرية، وعمال المصانع وموظفي الشركات المتضررين من الخصخصة أو غلق الحكومة لتلك المصانع والشركات اللي بيعتمدوا عليها كمصدر للرزق، أو أي مواطن متضرر من سياسات الحكومة.
سابعاً: العصيان المدني هو أكثر الوسائل السلمية لرفض سياسات الحاكم بشكل عام، أو أن يتمثل في صورة إضراب يقوم به مجموعة تضررت من سياسات خاصة ( زي إضراب عمال المحلة ابريل 2008 ) .. العصيان المدني هو وسيلة ضغط على الحكومة لتنفيذ مطالب عامة، مطالبنا المرة دي محدش ليه حجة يختلف معاها، مطالب ( أستطيع أن أقسم على ذلك ) يتفق عليها الشعب كله، اللهم إلا ضالاً أو فِـلاً.
المطالب :-
1. تنحى المجلس العسكرى عن إدارة البلاد بعد أن أثبت فشله تماماً وتسليم السلطة إلى مجلس الشعب.
2. إقالة حكومة الجنزورى وتعيين حكومة إنقاذ وطنى حقيقية بواسطة مجلس الشعب.
3. فتح باب الترشح لانتخابات الرئاسة فوراً
4. تشكيل لجنة تحقيق خاصة تتمتع بكل الصلاحيات القضائية والتنفيذيه للتحقيق فى كل الجرائم والمذابح التى تم ارتكابها منذ 25 يناير 2011 وحتى الآن.
5. تشكيل محاكم سياسية عاجلة وعادلة لكل عناصر النظام السابق.
6. إقالة النائب العام فوراً.
7. البدء فى إعادة هيكلة وتطهير وبناء وزارة الداخلية وخاصة جهاز الأمن الوطنى.
عاشت مصر ,,
يسقط يسقط حكم العسكر ,,
